DÍA 3 - Nas redes do galego


Hoxe toca falar do galego en Internet e nas redes sociais:
 
PREGUNTAS:
  • Seguides alguén nas redes sociais? A quen?
  • En que lingua fala normalmente?
  • Coñecedes alguén que sempre fale galego nas redes?

O certo é que Internet está cheo de creadoras e creadores de contido na nosa lingua: na páxina de Somos Cultura podedes atopar proxectos en galego de calquera cousa que imaxinedes.

Algunhas iniciativas coma a de Orgullo Galego acadaron centos de miles de seguidores simplemente falando da nosa lingua e a nosa cultura. Se estades orgullosos e orgullosas de ser galegos e galegas, non perdades a oportunidade de seguilos!

Mesmo algúns dos coles que estades a participar no Modo galego, actívao! tedes as vosas propias canles de Youtube, como é o caso dos Baroutubers do CEIP de Barouta, onde o alumnado publica recensións dos libros que vai lendo. Tamén sabemos que nalgunhas aulas estades a traballar agora mesmo en facer os vosos propios vídeos de curiosidades e titoriais, non si?

Quen sabe, quizais algún día optedes a algún dos premios do certame Youtubeiras, que se celebra todos os anos coa colaboración do voso Concello.

En resumo, en galego temos youtubeiros e youtubeiras, tuiteiros e tuiteiras e mesmo instagrameiros e instagrameiras. Pero onde parece que o galego está a ter máis éxito é entre as tiktokeiras e os tiktokeiros:

  • PREGUNTA: Cantas visualizacións credes que suma a etiqueta #galego nesta rede?
  • RESPOSTA: (Seleccionade o texto co rato para vela) Douscentos cincuenta e cinco millóns e medio de visualizacións en TikTok!

Son moitísimas, non si? Pois boa parte destas visitas son grazas á canle máis top desta plataforma, que de seguro coñecedes:

O TikTok do Dígocho eu! ten agora mesmo máis de 300.000 seguidores e case 8 millóns de likes!

Pois a que non sabedes quen mandou un saúdo especial para todas as nenas e nenos de Ames que participades no Modo galego, actívao? Dádelle ao play que ides caer de cu!


E antes de rematar:

PREGUNTA:
  • Se tivésedes a oportunidade de ter unha canle moi coñecida nas redes sociais de que falariades nela?

 


 Pois ata aquí a entrada de hoxe.

 

Para a Educación Infantil: 

Hoxe toca falar dos deportes e as afeccións, así que ídevos estarricando, espreguizando ou estricando e movédevos un pouquiño para quecer, porque facer exercicio é moi divertido e saudable.

Ademais, existen opcións para todos os gustos, como ben nos explican neste vídeo Digochiño e mais Esther.

 
PREGUNTAS:
  • E a vós, gústavos algún deporte?
  • E hai algunha outra cousa que vos guste moito facer?

Nesta ligazón tedes unha chea de léxico relacionado coa actividade física. Aínda que é dun temario para maiores, hai frases moi divertidas que seguro que podedes aproveitar.

E nesta lista de reprodución tedes unha morea de vídeos sobre deportes e o vocabulario en galego.